Clarins boosters .. تجربتي مع القطرات المعززة للبشرة من كلارنس

سلااااام عليكم ..

وحشني التدوين ..

تدوينة اليوم عن منتجات صارلي حوالي سبع شهور استخدمها - بوسترز كلارنس- هي مدعمات او معززات مركزة للبشرة ومنها 3 انواع كل نوع مخصص لعلاج مشكلة معينة .. وراح أكتب عن كل نوع مين يناسب وايش يسوي و طريقة استخدامه وآخر شيء بكتب رأيي فيهم ..

أول شي ..ايش هو البوستر و ايش فرقه عن السيروم ؟
البوستر : 

• منتج علاجي مركز لازم تخلطين من 3-5 قطرات منه مع إما كريمك المرطب أو الماسك .. عشان يخفف لك من تركيزه ماينفع تحطينه على البشرة مباشرة ..

• يستخدم لفترة محدودة لعلاج مشكلة معينة في بشرتك وكل بوستر يختص في مشكلة .. وتقدرين توقفينه بعد ماتحصلين على النتيجة اللي تحبين .. 

السيروم :

• منتج عناية وقد يكون علاجي لكن لفترة معينة بحيث ممكن بعد ماتوقفين استخدامه ترجع بشرتك كما كانت قبل استخدامه 

• تستخدمينه بشكل يومي ودائم قبل كريمك المرطب ..

اللي متابعيني من زمان تعرفون كيف أحب كلارنس وأثق في منتجاتها لأنها تخضع لإشراف طبي وتناسب كل أنواع البشرة حتى الحساسة ...

والحين كلارنس نزلوا 3 أنواع بوسترات مركزة متخصصة 

الأزرق = إصلاح 

الأخضر = تطهير

البرتقالي = طاقة 

طبعاً انتي مو مضطرة تشترينهم كلهم .. اختاري اللي تحتاجه بشرتك فقط ..

سعر الواحد 185 حجمه 15 مل حتى لو كنتي تستخدمينه كل يوم بيجلس عندك اكثر من 6 شهور لأنك ماتحتاجين منه إلا كم قطرة باليوم فقط ..

تحصلونه بأي مكان فيه كلارنس (سيفورا , وجوه , دبنهامز ,,,الخ)

أول نوع بتكلم عنه الأزرق

 

Booster Repair

مُعزّز الإصلاح ..
للبشرة الضعيفة بسبب العوامل الخارجية مثل التعرَض للشمس أو تغيَر بالجو أو بالماء ..

هالبوستر يوعدك إنه يرمم بشرتك ويريحها و يخفف الإحمرار ..

بعد اسبوع من استخدامه بتلاحظين بشرتك ناعمة ومشدودة أكثر وبعد تقريباً اربع اسابيع بتلاحظين الفرق براحة بشرتك وقوتها ..و ممكن تستمرين باستخدامه إلى أن تحصلين على نتيجة افضل ..

شخصياً مااحتجت استخدمه لمدة طويلة بس جربته بالسفر لمدة أسبوع تقريباً وبان الفرق معي من  أول ليلتين تقريباً ..

طريقة استخدامه :

اخلطي من 3-5 قطرات مع كريمك المرطب .. شخصياً أفضل استخدامه قبل النوم مع كريم الليل او المرطب قبل النوم اكثر وأصحى أحصل بشرتي مرتاحة وهادية ..

.

.


Booster Energy

معزّز الطاقة ..
للبشرة اللي تعاني من ارهاق وإجهاد (سهر, ضغط عمل , حمية غذائية ...الخ)

هالبوستر يوعدك يشد البشرة وينعشها ويخفي علامات التعب ويعيد اشراقتها ..
بعد اسبوع بتشوفين بشرتك مشرقة وصافية أكثر .. لو ماحصلتي على النتيجة باسبوع استمري شهر شهرين باستخدامه حتى توصلين للنتيجة اللي تبينها ..

شخصياً هذا أكثر نوع حبيته لأنه أكثر واحد بشرتي تحتاجه وقت يكون عندي ضغط دراسة واختبارات وسهر او قل نوم وبشرة مرههقه شاحبة استخدمه فضيييع فضييع يخلي بشرتي قطنة وردية << تخيلوها ..

طريقة استخدامه :

كلهم نفس الطريقة لكن أرجع اكتبها كل مره عشان اللي ماقرت المرة الأولى تقرا المره الثانية .. تخلطين من 3-5 قطرات منه مع كريمك المرطب أو مع ماسك .. أنا أحب استخدم هالنوع الصباح مع المرطب ..
أحبه 

.

.

Booster Detox

مُعزّز التطهير.. 
للبشرة اللي تواجه تلوث قوي أو تدخين أو إفراط بالأكل أو بعد يوم طويل ومتعب ..

البوستر يوعدك ببشرة نضرة وصحية ناعمة وخالية من السموم والملوثات .. 
أنا شخصياً مااستغني عنه .. هذا أكثر نوع استخدمه وأحتاجه كثيييير هو والانيرجي .. 

غالباً مااستخدمه قبل النوم لو كان يومي متعب و فيه ملوثات كثيرة واحتاج بشرتي تكون متطهرة ونظيفة وصحية بحيث ماتتأثر بهالملوثات هذا جمييييييييل ..

طريقة استخدامه :

مثلهم كلهم من 3-5 قطرات مع كريم المرطب وأنصح فيه قبل النوم عشان تحصلين على نتيجة رائعة باليوم التالي بشرة صحية نضرة ونااعمة ..

.

أحبه 
..حاولت أعرض لكم المنتجات و أتكلم لكم عنهم بأبسط صورة وأكثر اختصار يارب تكون التدوينة حلوة وتستفيدون منها ..المنتجات جداً ممتازة للبشرة أنصح فيها بقوة ..